गरुडा, बैसाख २५

रौतहटको गरुडा नगरपालिकामा नेकपा एमालेको तर्फबाट मेयर पदका उम्मेदवार कन्थमणि प्रसाद कलवारले गरुडा नगरपालिकालाई नमुना नगरपालिकाको रुपमा विकास गर्ने प्रतिबद्धता जनाएका छन् ।

एमालेबाट मेयर पदका प्रत्याशी कलवारले गरुडाको मुख्य बजारलाई डिभाइडरसहितको हरियालीयुक्त सहर बनाउने, गरुडाको सुन्दरतामा वृद्धि गर्ने तथा खानेपानीको समस्या समाधान गरी गरुडा नगरलाई सफा र सुन्दर नगरको रुपमा विकास गर्ने बताएका छन् । कलवारले गरुडा नगरपालिकामा व्यवस्थित नालाको व्यवस्था गर्ने बताउँदै विभिन्न पर्यटकीय क्षेत्रको विकास गर्ने पनि बताएका छन् ।

गरुडा नगरपालिकालाई देशकै एउटा नमुना नगरपालिकाको रुपमा विकास गरी देशमा गरुडाको पहिचान स्थापित गर्ने सोच आफ्नो रहेको एमाले उम्मेदवार कलवारको भनाइ छ ।

कलवारले हरेक भूमिहीन तथा दलित परिवारलाई जमिन किनेर पक्की घर बनाइदिने प्रतिबद्धता पनि व्यक्त गरेका छन् ।

गरुडाको विकासको लागि र गरुडालाई भ्रष्टाचारमुक्त बनाउनको लागि सर्वसाधारण मतदाताले एमालेलाई नै रोज्नुपर्ने समय आएकोले सबैले चुनावको दिन पर्खिरहेको र सबै मतदाताले एमालेलाई नै गरुडा नगरपालिकाको नेतृत्व दिने तयारी गरिसकेको विश्वास आफूलाई लागेको एमाले उम्मेदवार कलवारले जानकारी दिएका छन् ।