शपथ ग्रहण गरी कार्यभार सम्हालेसँगै गरुडा नगरपालिकाको सबै सामुदायिक विद्यालयमा एक हप्ताभित्र दिवा खाजा संचालन गर्ने घोषणा गरेकी उपप्रमुख पुनमकुमारी चौधरीको निर्देशनमा विद्यालय खाजाको मेनु तयार भएको छ । संचालनमा रहेका कतिपय विद्यालयले मेनु अनुसार बुधवारदेखि नै खाजा संचालन गरेका छन् । लामो समयदेखि बन्द रहेको विद्यालय खाजा कार्यक्रमलाई सुचारु गर्ने निर्देशनले शिक्षा शाखा सक्रिय भएको हो । हप्तामा पाँच दिन विद्यालय खुल्ने वर्तमान प्रचलन अनुसार नै खाजाको मेनु शिक्षा शाखाले प्रकाशन गरेको हो । मेनु अनुसार सोमवार पुरी तरकारी, मंगलवार एउटा स्याउ र एउटा केरा, बुधवार भात र अन्डाकरी, विहीवार खिर र शुक्रवार खिचडी वा तरकारी चिउरा गरुडा नगरपालिकामा विद्यालय दिवा खाजा संचालन हुने देखिन्छ ।