रौतहटको गरुडा नगरपालिकाका नगर प्रमुख कन्थमनि प्रसाद कलवारले शिक्षामा सुधारको लागि आफू प्रतिबद्ध रहेको बताएका छन् । गरुडा नगरपालिका २ गेडहीगुठीमा रहेको माध्यमिक विद्यालय भवनको शिलान्यास गर्दै नगर प्रमुख कलवारले नगरपालिकाको शिक्षामा गुणस्तर आफ्नो पहिलो प्रतिबद्धता रहेको बताएका छन् । शिक्षाको क्षेत्रमा सम्भव भएसम्मको सुधार गर्ने बताएका नगर प्रमुख कलवारले विद्यालय भवनको शिलान्यासले गेडहीगुठीको शिक्षामा केही थप सुधार हुने आशा पनि व्यक्त गरेका छन् । नगर प्रमुख कलवारले राष्ट्रपति शैक्षिक सुधार कार्यक्रमबाट प्राप्त ३६ लाख रुपैयाको लागतमा बन्ने विद्यालय भवनको शिलान्यास गरेका हुन् । साथै शिलान्यासमा गरुडा नगरपालिकाकी उपप्रमुख पुनमकुमारी चौधरी, नगरपालिकाका निमित्त प्रमुख प्रशासकीय अधिकृत रामबाबु राय यादव, वडाध्यक्ष कृष्णनन्दन सहनीसहित विभिन्न सामाजिक तथा राजनैतिक व्यक्तित्वको सहभागिता रहेको थियो ।