गरुडा खबरपालिका
नेपालमे बज्जिका भाषा आ साहित्यके क्षेत्रमे पर्हुसे प्रकाशन होरहल बज्जी साहित्यिक त्रैमासिकके पाँचमा अंक प्रकाशन भेल हए । बज्जीके नयाँ अंकके एक कार्यक्रमबिच गरुडा नगरपालिकाके नगर प्रमुख कन्थमनि प्रसाद कलवार सार्वजनिक कएलन । हुनका साथे डा. संजय कुमार साह आ समाजसेवी शैलेन्द्र कुमार यादव भी बज्जी ५ के सार्वजनिक कएले छत ।
बज्जीके नयाँ अंकमे साधना कृष्ण, हेमा सिंह, साधना कुमारी यादव, बृजकिशोर यादव, देवीप्रसाद थापा मामा, कन्जदेवी उपाध्याय, डा. सतीशचन्द्र भगत, हिरनमयी आचार्य शर्मा, अम्बिका धिताल, धनसिंह विश्व, मदमावती देवी, प्रियान्सु साह, रीताकुमारी साह, सोनम सहनी, रेणु गुप्ता, प्रेरणा यादव, गणेशकुमार लाल, रेणुकुमारी पटेल, सञ्जय साह मित्र, मनमोहन सिंह मनोहर, शीतल वर्मा, भूपी शेरचन आ अटलबिहारी बाजपेयीके विभिन्न विधाके रचना प्रकाशित हए ।पत्रिकामे प्रकाशित अटलबिहारी बाजपेयी, भूपी शेरचनसहित अन्य विशिष्ट साहित्यकारके रचना विभिन्न माध्यमसे पहिले प्रकाशित हए जेकर बज्जिका भाषामे अनुवाद कएलगेल हए ।
जिला प्रशासन कार्यालय सर्लाहीमे दर्ता होके प्रकाशन होरहल बज्जीके नयाँ अंकके लोकार्पण करइत नगर प्रमुख कलवार मातृभाषाके सेवामे सक्रिय पत्रिकाके अपनासे होसकेबाला सहयोग करेके लेल अपने तैयार रहल बतएले छत । अइसही डा. संजयकुमार साह मातृभाषाके सेवामे अपनाओरसे सम्भव होएबाला सभी किसिमसे सहयोग करेला अपने तैयार रहल बतएले छत ।
अंक ५ प्रकाशन होएलाके बादमे अंक ६ के तैयारी भी सुरु कएलगेल हए । अंक ६ के लेल बज्जिका साहित्यकार लोगसे रचना आह्वान कएलगेल हए ।