समनपुर खबरपालिका

रौतहटको गढीमाई नगरपालिकाका नगर प्रमुख श्यामप्रसाद यादवले बज्जी साहित्यिक त्रैमासिक पत्रिकाको विमोचन गरेका छन् । गढीमाई नगरपालिकाको कार्यालयमा नगर प्रमुख यादव र त्रैमासिकका प्रधान सम्पादक सञ्जय साह मित्रले संयुक्त विमोचन गरेका हुन् ।

जिल्ला प्रशासन कार्यालय सर्लाहीमा दर्ता भएर प्रकाशन भइरहेको बज्जी पत्रिकाको छैटौँ अंकको विमोचन गर्दै नगर प्रमुख यादवले पत्रिकाले बज्जिका भाषा र साहित्यको विकासमा महत्वपूर्ण योगदान दिइरहेकोले आफूले सहयोग गर्ने बताएका छन् ।

सर्लाही, रौतहट र बारा जिल्लाका बज्जिका साहित्यकारहरूको विभिन्न विधाका रचनाहरू समेटिएको पत्रिका नेपाल र भारतका बज्जिका साहित्यकारबिच परिचित रहेको छ ।

स्थानीय लोकसाहित्यलाई प्राथमिकता दिइरहेको बज्जी पत्रिकाले नवप्रतिभालाई प्रोत्साहन गर्ने काम गरिरहेको प्रधान सम्पादक मित्रले जानकारी गराएका छन् ।

कार्यक्रममा नगरपालिकाका निमित्त प्रमुख प्रशासकीय अधिकृत नागेन्द्रप्रसाद यादव तथा पत्रिका व्यवस्थापक किशुनदयाल श्रीकृष्णले जनस्तरमा पत्रिका पु¥याउन आवश्यक रहेको र आफ्नो भाषा तथा संस्कृतिको विषयमा सबैले चासो राख्नुपर्ने धारणा राखेका छन् ।