रौतहट – फाल्गुन १६,
रौतहट सदरमुकाम गौरमे एक युवक करिब अढाई दशकसे निशुल्क शिक्षण शिक्षण कररहल हए । ठन्ढी, गरमी आ बरखा सभी मौसममे गरिब, असहाय आ दलित बालबालिकाके निशुल्क पढाबेबाला युवक छत निरज साह ।

करिब ४० वर्षीय साह एसएलसीके परीक्षा देलाके बाद खाली रहल समयमे अपना घरसे लेके टोलाके बालबालिकाके टिउसन पढाबेके सुरुआत कएले रहलन । ओही समयमे देखलन कि कुछ बालबालिका ऐसन हए जेकरा कौनो सहारा नहए मगर लिखपढ करएलापर जीवनमे सायद कुछ निमन करसकइअ । अइसन विचार मनमे अएलापर हुन टिउसन पढाबेके सुरु कएलन ।
गौर नगरपालिका १ के कृष्णकुमार साह आ मुनीदेवीके ४० वर्षीय पुत्र निरज साह विगत २०५६ सालसे गौरमे निशुल्क टिउसन पढारहल छत । शिक्षाशास्त्रमे स्नातक कएले साह अपने गौरमे ही रहल बाल मन्दिर विद्यालयमे राहत शिक्षक भी छत । शिक्षक साह मौसमके मोताबिक समय निर्धारण कके दैनिक करिब तिन घन्टा निशुल्क टिउसन पढारहल छत । आजकाल सबेरे ६ बजेसे ९ बजेतक गौर राइस मिलमे निशुल्क टिउसन पढारहल शिक्षक साहके खूब चर्चा रहल हए ।
नियमित टिउसन पढरहल गौर ८ कुडवाके शंकर यादवके कहनाम हए – हमर माई बाबु कौनो नछत । हमरा अइसन अनाथके निशुल्क टिउसन पढाके निरज सर बहुत निमन काम कएले छत ।
गौर ५ कोइरीटोलाके खुशबु महतो भी शंकर यादवके जइसन प्रशंसा करइत कहइछत – निरज सर हमरा निशुल्क पढारहल छत । हमरा जइसन सयसे बेसी विद्यार्थी निरज सर लमन टिउसन पढइअ । सर बहुत निमनसे पढाबइछत ।
विपन्न परिवारके खुशबुके बाबुजी नछथिन ।

एकओर निशुल्क टिउसन पढारहल निरज साह दोसरओर अति विपन्न बालबालिकाके शैक्षिक सामग्री भी निशुल्क उपलब्ध करारहल छत । जेकरा किताब, कापी आ लिखेला डटपेन किनेके समला नहए, ओइसन विद्यार्थीके निरज सर कभी अपनेसे त कभी दोसरासे माङचाङके भी आधारभूत शैक्षिक सामग्री उपलब्ध करारहल छत । पत्रकार रामपुकार पटेलके कहनाम हए – निरज सरके समाजसेवा प्रशंसनीय हए । किताब, कापी, कलम किने नसकेबाला गरिब विद्यार्थीके दोसरासे भी माङके देनाइ आ गरिब असहायके शिक्षाके अगाडि बढाबेके सोचनाइ अपनेआपमे प्रशंसायोग्य काम हए ।
दैनिक सयसे अधिक बालबालिकाले निरन्तर निशुल्क टिउसन करारहल शिक्षक साह आगामी दिनमे भी अपन शिक्षणसे समाजसेवा करइरहेके प्रतिबद्धता व्यक्त करइछत । हुनकर कहनाम हए – हम समाजसेवा कररहल छी ।
शिक्षक साहके समाजसेवामे समाजके विभिन्न वर्गके लोगके सहयोग आ सहानुभूति रहल हए । नेपाल पत्रकार महासंघ रौतहट शाखा अध्यक्ष प्रेमचन्द्र झाके कहनाम हए – करिब बाइस बरस पहिले ही हम हुनकर निशुल्क टिउसनके समाचार प्रकाशित कएले रही । आजतक शिक्षक साह सयसे अधिक विद्यार्थीके हर दिन निशुल्क टिउसन पढावते आरहल छत ।