रौतहट, जेठ २८
रौतहटका अधिकांश पालिकाहरुले विद्यालय संचालनको समय परिवर्तन गरेको छ । गत हप्ता शिक्षा विकास तथा समन्वय इकाईको परिपत्र अनुसार जिल्लाका पालिकाहरुले विद्यालयमा गर्मी विदा दिएको भए पनि गर्मी लगातार बढेपछि वैकल्पिक उपाय अपनाएको देखिएको छ ।
अत्यधिक गर्मी रहेको र दिउँसो लु लाग्ने डर रहेको अवस्थामा पालिकाहरुले बिहानको आधा समय मात्र विद्यालय संचालन गर्ने तयारी गरेका छन् ।
रौतहटका गौर, गरुडा, गढीमाईलगायतका नगरपालिकाहरुले समय परिवर्तन गरेर आइतवारदेखि विद्यालय संचालन गर्ने निर्णय सार्वजनिक गरेका छन् ।
रौतहट सदरमुकाम गौर नगरपालिकाले बिहान ६ः२० देखि ९ः२०सम्म कक्षा संचालन गर्ने भएको छ । यसै गरी गरुडा तथा गढीमाई नगरपालिकाले बिहान ६ः३०देखि ९ः३०सम्म कक्षा संचालन गर्ने निर्णय सार्वजनिक गरेका छन् ।
विद्यालयमा टाढाटाबाट विद्यार्थीहरु पढ्न आउने तथा पढेर फर्किन सजिलो होस् भनेर हरेक दिन कम्तीमा तिन घन्टा विद्यालय संचालनको निर्णय गरिएको बताइएको छ ।