रौतहट
रौतहट सदरमुकाम गौरको एक घरमा आगलागी भएको छ । आगलागीमा परी धेरै मानिस घाइते भएका छन् ।
घरमा बालेको मैनबत्तीबाट सल्केको आगोले घरमा रहेको खाना पकाउने ग्याँस सिलिन्डर सल्केपछि आगोले भीषण रुप लिएको थियो सिलिन्डर पड्किँदा निकै धेरै क्षति भएको छ ।
गौर ४ स्थित टिकुलिया गाउँका बिगन साहको घरमा आगो लागेर सिलिन्डर पड्को हो । सिलिन्डर पड्केपछि भयंकर रुपमा फैलिएको आगाले साहको घर पूर्ण रुपमा जलेर नष्ट भएको छ । घरमा लाखौँको क्षति भएको छ भने १४ जना घाइते भएका छन् । घाइतेमध्ये केही घर फर्केका छन् भने केहीको उपचार प्रादेशिक अस्प्ताल गौरमा भइरहेको छ ।
आगोको सुरुआती स्वरुप प्रलयजस्तो देखिएको नगर प्रमुख शम्भु साहले बताएका छन् । गौर नगरपालिकाको वैकल्पिक फायर बिग्रेडका साथै स्थानीयको सहयोगमा प्रहरीले आगोलाई नियन्त्रणमा लिन सफल भएको थियो ।
घटना लगत्तै नगर प्रमुख साह घटनास्थल पुगेका थिए । अस्पतालमा पनि बिरामीलाई भेटेर आवश्यक सहोग गर्न र बिरामीको राम्रो उपचार गर्न निर्देशन दिएका छन् ।