मदन ठाकुर
रौतहट, असार १०
पूर्व प्रधानमन्त्री तथा नेकपा एकीकृत समाजवादीका अध्यक्ष माधवकुमार नेपालले जनताको सेवामा समर्पित हुन जनप्रतिनिधि तथा कार्यकर्ताहरुलाई आह्वान गरेका छन् ।
गृहनगर रौतहटको गौर नगरपालिकाको बारौँ नगर अधिवेशनलाई आइतवार प्रमुख अतिथिको रुपमा सम्बोधन गर्दै नेता नेपालले जनप्रतिनिधिहरुलाई रचनात्मक काम गर्न तथा पार्टीका नेता कार्यकर्तालाई सहयोग गर्न आह्वान गरेका हुन् ।
गत वर्षदेखि नै गौर नगरपालिकाले निकै राम्रोसँग कार्य सम्पादन गरिरहेकोमा प्रशंसा गर्दै नेता नेपालले राम्रो काम गर्ने नगरपालिका तथा गाउँपालिकालाई थप विकासको रकम उपलब्ध गराउन नेपाल सरकारसित माग गरेका छन् । कार्य सम्पादनमा गौर नगरपालिका मधेश प्रदेशमा नै उत्कृष्ट भएको थियो । मधेश प्रदेशमा सर्वोत्कृष्ट कार्य सम्पादन गर्ने गौर नगरपालिकाका जनप्रतिनिधि तथा कर्मचारीलाई नेता नेपालले बधाई दिँदै अझ राम्रोसित काम गर्ने चुनौती थपिएको पनि बताएका छन् ।
नेता नेपालले गौर नगरपालिकाका गरिब घर परिवारलाई पहिचान गरी परिचयपत्र उपलब्ध गराउन र रोजगारीको अवसर प्रदान गर्न नगर प्रमुख शम्भु साह कानुसित आग्रह गरेका छन् ।
यसै गरी नेता नेपालले जिल्लाको ठूलो समस्याको रुपमा रहेको टिर ब्याज पीडितको पक्षमा छिटो छरितोसँग काम गनै स्थानीय प्रशासनलाई निर्देशन दिएका छन् । गरिबलाई दुःख दिएर पैसा कमाउने र अर्काको सम्पत्ति लिलाम गर्ने, बेच दिने, हडप्ने जस्ता कार्य रोक्न पूर्व प्रधानमन्त्री नेपालले सम्बन्धित पक्षको ध्यानाकर्षण गराएका छन् ।
गौर नगरपालिकाका नगर प्रमुख शम्भु साह कानुले नगर अधिवेशनमा आउँदो आर्थिक वर्षको लागि नीति तथा कार्यक्रम प्रस्तुत गरेका छन् । शिक्षा, स्वास्थ्य, भौतिक पूर्वाधार तथा खेलकुदलाई प्राथमिकतामा राखी नगर प्रमुख साहले लोकप्रिय नीति तथा कार्यक्रम प्रस्तुत गरेका छन् ।
नगर अधिवेशनमा उपप्रमुख शैलदेवी साहको तर्फबाट नगर प्रवक्ता तथा वडाध्यक्ष अर्जुन सिंहले आगामी आर्थिक वर्षको लागि ६८ करोड ३६ लाख रुपैयाको अनुमानित आय व्यय प्रस्तुत गरेका छन् । (नागरिक अनलाइनबाट)