गरुडा २६ बैशाख
रौतहटको गरुडा नगरपालिकामा मेयर पदका उम्मेदवार बृजकिशोर यादवले गरुडा नगरबासीको माग र यसको आवश्यकताको आधारमा गरुडा नगरपालिकाको विकास गर्ने बताएका छन् । नेकपा एकीकृत समाजवादीको तर्फबाट मेयर पदका उम्मेदवार रहेका चर्चित शिक्षित युवा तथा मधेसवादी आन्दोलनका अग्रणी नेता बृजकिशोर यादवले गरुडा नगरबासीको सपना आफूले साकार पार्ने बताएका छन् । गरुडामा आम नागरिकले सोचेको भन्दा राम्रो प्रशासन दिएर देखाउने प्रतिबद्धता व्यक्त गर्दै नेता यादवले पारदर्शीता तथा प्रतिबद्धताले आफूलाई जनताले पत्याएको विश्वास व्यक्त गरेका छन् । गरुडा नगरपालिकाको सबै वडामा उम्मेदवार खडा गर्ने गरुडाको एक मात्र उम्मेदवार आफू मात्र रहेको बताउँदै बृजकिशोर यादवले जनताले आफूलाई सेवा गर्ने मौका दिइरहेकोमा आफू विश्वस्त रहेको बताएका छन् । यसै बिच नेता यादव गरुडा नगरपालिकाको वडा नम्बर १ जयनगर, वडा नम्बर २ गेडहीगुठी र अन्य वडा तथा गाउँका नागरिकहरुसित जनताको माग अनुसार छलफल गरेको बताएका छन् । जनतासित छलफल गर्दा आफूले जनताको विश्वास जितेको र जनताले आफूलाई विश्वास गरेको पत्रकारहरुलाई स्पष्ट पारेका छन् ।