गरुडा २६ बैशाख
रौतहटको कटहरिया नगरपालिकामा नेकपा माओवादी केन्द्रबाट मेयर पदका उम्मेदवार नसरुदीन अन्सारीले आफूले चुनाव जित्न लागेको बताएका छन् । कटहरियामा पत्रकारहरुसित कुराकानी गर्दै मेयर उम्मेदवार अन्सारीले सबै वडामा आफ्नो बलियो स्थिति रहेको बताउँदै जनताले आफूलाई पत्याइरहेको बताएका छन् । आफूले चुनाव जितेपछि सबै किसिमको ढिला सुस्ती र भ्रष्टाचारलाई अन्त्य गर्ने बताउँदै अन्सारीले जनताको सेवा गर्न आफू कुनै पनि कसर बाँकी नराख्ने बताएका छन् । आफूले निकै पहिलेदेखि समाजसेवा गरिरहेकोले कटहरियाबासीमा राम्रो प्रभाव रहेको र अब चुनावमा कटहरियाबासीले आफूलाई सेवा गर्ने मौका दिएमा आफू मालिक नभई जनताको चौकीदार बनेर सेवा गर्ने बताएका छन् । आफूले चुनाव जितेमा कटहरिया नगरपालिका भित्रका सबै भूमिहीन नागरिकलाई जमिन किनेर घर बनाएर दिने प्रतिबद्धता व्यक्त गर्दै अन्सारीले आफूमाथि नेकपा माओवादी केन्द्रका अध्यक्ष प्रचण्डको आशीर्वाद रहेको बताएका छन् ।