गरुडा, जेठ १९
रौतहटको गरुडा नगरपालिकाका नगर प्रमुख कन्थमनि प्रसाद कलवारले शुक्रवार विद्यालय भवनको शिलान्यास गरेका छन् । एक समारोहमा नगर प्रमुख कलवारले गरुडा नगरपालिका ९ सिसवा धमौरामा रहेको रहेको सहिद लालबाबु दास प्राथमिक विद्यालयमा दुई कोठे भवनको शिलान्यास गरेका हुन् ।
राष्ट्रपति शैक्षिक सुधार कार्यक्रम अन्तर्गत २२ लाख ५० हजार रुपैयाको लागतमा भवनको निर्माण हुने जनाइएको छ ।
विद्यालय भवनको शिलान्यास गर्दै नगर प्रमुख कलवारले विद्यालयमा डेस्क, बेन्च तथा शिक्षकको अभाव लगायतको विषयमा पनि नगरपालिका गम्भीर रहेकोले समस्या समाधानका लागि पहल गरिने बताएका छन् । भौतिक पूर्वाधार विकासका साथै शैक्षिक गुणस्तर वृद्धि गराउन समेत नगरपालिकाले सशक्त भूमिका निर्वाह गर्ने नगर प्रमुखले बताएका छन् ।
भवन शिलान्यासको अवसरमा उपप्रमुख पुनमकुमारी चौधरी, विद्यालयका प्रधान अध्यापक, विद्यालय संस्थापक, शिक्षक तथा कर्मचारी र अभिभावकहरुको उपस्थिति रहेको थियो ।