असोज २१,
गरुडा
रौतहटको गरुडा नगरपालिकाको प्रमुख प्रशासकीय अधिकृतको रुपमा मुस्ताक आलम हाजिर भएका छन् । आइतवार नगर प्रमुख तथा नगरपालिकाका कर्मचारीहरुको उपस्थितिमा आलमले कार्यालय प्रमुखको जिम्मेवारी सम्हालेका हुन् ।
नगरपालिका कार्यालयमा कार्यालय प्रमुख नहुँदा अप्ठ्यारो भइरहेको थियो । गत केही समयदेखि कार्यालय प्रमुख नहुँदा निमित्त कार्यालय प्रमुखको भरमा नगरपालिका संचालन भइरहेको थियो ।
दशैँ नजिकिँदै गर्दा कार्यालय प्रमुख नभएको कारण तलब खान पाउने कि नपाउने भनेर कर्मचारीहरुमा त्रास रहेको थियो । कार्यालय प्रमुखको रुपमा आलम हाजिर भएसँगै चाडपर्वको मुखमा कर्मचारीहरुले तलब खान पाउने निश्चित भएको छ ा।
आलमले गरुडा नगरपालिकाको कार्यालय प्रमुखको दोस्रोपटक जिम्मेवारी पाएका हुन् । केही वर्ष पहिले पनि आलम गरुडा नगरपालिकाको प्रमुख प्रशासकीय अधिकृतको जिम्मेवारीमा थिए ।
आइतवार आलमले कार्यालय प्रमुखको जिम्मेवारी सम्हालेपछि नगर प्रमुख कन्थमनि प्रसाद कलवारले कार्यालयको कामकाजमा सहजता आउने तथा समग्र विकास र सुशासनमा आलमले महत्त्वपूर्ण भूमिका निर्वाह गर्ने विश्वास आफूले लिएको बताएका छन् ।