खबरपालिका, गरुडा
रौतहटको गरुडा नगरपालिका १ का नवनिर्वाचित वडाध्यक्ष शेख ओहावले आफ्नो वडामा माध्यमिक विद्यालय संचालन गर्ने घोषणा गरेका छन् । जयनगरमा माध्यमिक विद्यालय नरहेको अवस्थामा अधिकांश विद्यार्थी धरहरी र केही विद्यार्थी माइधिया पढ्न गइरहेका छन् । गरुडा नगरपालिकाको वडा नम्बर १ र ५ बाहेक सबै वडामा माध्यमिक विद्यालय रहेका छन् । वडा नम्बर १ जयनगरमा निम्न माध्यमिक तह संचालनमा रहेकोले माध्यमिक तह संचालन गर्न धेरै संघर्ष गर्नु नपर्ने देखिएको छ । स्थानीयको माग र आवश्यकता पनि गाउँमा एउटा माध्यमिक विद्यालय हुनुपर्ने रहेको छ । आफ्नो कार्यकालमा एउटा माध्यमिक विद्यालय संचालन गर्ने प्रतिबद्धता व्यक्त गरेका वडाध्यक्ष शेख ओहावले वडा कार्यालयबाट हुने सबै किसिमको सिफारिश तथा जन्म दर्ता, विवाह दर्ता, मृत्यु दर्ता पनि पूर्ण निशुल्क गर्ने निर्णय गरेको बताएका छन् ।