खबरपालिका, रौतहट
मध्यरौतहटको करिब सबै पालिकामा कार्यपालिका निर्वाचन सम्पन्न भएको छ । मध्यरौतहटको गढीमाई र माधव नारायण नगरपालिकामा आइतवार कार्यपालिकाको निर्वाचन सम्पन्न भएसँगै जिल्लाको मध्य भागको सबै पालिकामा निर्वाचन सम्पन्न भएको देखिएको छ । शनिवार मात्र गरुडा नगरपालिकाको कार्यपालिकाको निर्वाचन सम्पन्न भएको थियो । यसअघि मौलापुर, देवाही गोनाही र कटहरिया नगरपालिकाको पनि कार्यपालिकाको निर्वाचन सम्पन्न भएको थियो । मध्यरौतहटमा कार्यपालिकामा नेपाली काँग्रेस र वामपन्थीको वर्चस्व देखिएको छ । पहिले मध्यरौतहटमा जसपा नेपालको वर्चस्व रहेको थियो । मध्यरौतहटको गरुडा, माधव नारायण र देवाही गोनाही नगरपालिकाबाट जसपा नेपालको शासन एक साथ हटेको छ । पहिलेको तुलनामा नेकपा एमालेले राम्रो पकड जमाएको छ भने नेपाली काँग्रेसले पनि बलियो पकड बनाएको छ । मध्यरौतहटमा पहिलेभन्दा बामपन्थी भोट निकै बढेको देखिन्छ भने जसपा नेपालको भोट पहिलेको तुलनामा निकै घटेको पाइएको छ ।