खबरपालिका, कटहरिया
रौतहटको कटहरिया नगरपालिकाका नगर प्रमुख अजय प्रकाश जयसवालले विभिन्न विद्यालयको स्थलगत अनुगमन तथा निरीक्षण गरेका छन् । नगर प्रमुखले आफ्नो पहिलो घोषणा नै नगरभित्रका सम्पूर्ण विद्यालयमा कक्षा १ देखि माथि सबै कक्षा अंग्रेजी माध्यममा गर्ने बताएका थिए । नगरका सबै विद्यालयमा अंग्रेजी माध्यमको पढाइ र विद्यालय खाजाको विषयमा बुझ्नको लागि नगर प्रमुख जयसवाल आफैँ विभिन्न विद्यालय पुगेका छन् । कटहरिया नगर प्रमुख जयसवालले विद्यालयमा पुगेर अनुगमन गर्न थालेपछि विद्यालयको पठनपाठनमा सुधार हुने र विद्यालय खाजाको अवस्थामा पनि सुधार हुने विश्वास गरिएको छ । कमीकमजोरी देखिएको ठाउँमा नगर प्रमुख जयसवालले शिक्षक तथा प्रधान अध्यापकलाई सुझाव पनि दिएका छन् ।