गरुडा खबरपालिका
मध्यरौतहटमा थोरै हावासित शनिवार अलिकति वर्षा भएको छ । निकै कम समय भएको वर्षाले धरतीलाई हल्का पानीको अनुभव गराएको छ । करिब एक महिनादेखि रोकिएको वर्षा शनिवार थोरै भएको हो । चारैतिर पानी परिरहेको र रौतहटकै पनि चन्द्रपुरमा केही दिनदेखि हल्का पानी पर्न सुरु गरेको भए पनि मध्य तथा दखिनी रौतहटमा पानी नपरेर धानको बेना सुक्न थालेको छ । यस अवस्थामा शनिवार अलिकति मात्रै पानी परेपछि अब पानी पर्ने सम्भावना बढेको किसानहरुले विश्वास गरेका छन् । मोबाइल एपहरुले पनि मंगलवारदेखि पानी पर्ने सम्भावना रहेको भविष्यवाणी गरिरहेको देखिएको छ । समयमा पानी नपर्दा किसानको खेतको ब्याडमा धानको बेर्ना सुकेर किसानलाई घाटा लाग्ने र खेती नै प्रभावित हुने समस्या बढ्दै गएको हो ।