गरुडा नगरपालिकामा प्रथम त्रैमासिक परीक्षा असार २७ देखि

गरुडा खबरपालिका

रौतहटको गरुडा नगरपालिकामा प्रथम त्रैमासिक परीक्षा हुने भएको छ । जिल्लामा सबैभन्दा पहिले प्रथम त्रैमासिक परीक्षा गरुडा नगरपालिकाका विद्यालयहरुले लिन थालेका हुन् । गरुडा नगरपालिकाभित्रका विद्यालयहरुले असार २७ गतेदेखि प्रथम त्रैमासिक परीक्षा लिने भएको हो ।

गरुडा नगरपालिकाभित्रका विद्यालयका प्रधानाध्यापकहरुसित शनिवार नगर प्रमुख कन्थमनि प्रसाद कलवार तथा उपप्रमुख पूनमकुमारी चौधरीले छलफल गरेका छन् । विद्यालयका प्रधानाध्यापकहरुले खुलेर नगर प्रमुख तथा उपप्रमुखसित छलफल गरेका छन् । नगर प्रमुख कलवारले विद्यालयमा गर्मी विदा हुन थालेको तर प्रथम त्रैमासिक परीक्षा हुनेबारे केही नसुनिएको बताउँदै विद्यालयहरुले आन्तरिक रुपमा प्रथम त्रैमासिक परीक्षा लिएर मात्र गर्मी विदा दिन निर्देशन दिएका छन् ।

नगर प्रमुख कलवारको निर्देशनपछि प्रअहरुले आफ्नै पहलमा असार २७ देखि प्रथम त्रैमासिक परीक्षा लिने तथा प्रथम त्रैमासिक परीक्षा लिएपछि गर्मी विदा दिने भएका छन् । विद्यालयमा पाठ्यपुस्तक ढिलो आएको तथा अझै पनि कतिपय विषयको पाठ्यपुस्तक आउन बाँकी रहेको सन्दर्भमा सम्बन्धित विषयको पाठ्यक्रमको आधारमा अहिलेसम्म जे जति र जसरी पढाइ भएको छ, सोही आधारमा प्रथम त्रैमासिक परीक्षा लिन सकिने प्रअहरुको भनाइ रहेको छलफलमा सहभागी एक प्रअले जानकारी गराएका छन् ।