गरुडा खबरपालिका

रौतहटको गरुडा नगरपालिकामा प्रथम त्रैमासिक परीक्षा सुरु भएको छ । गरुडा नगरपालिकाका नगर प्रमुख कन्थमनि प्रसाद कलवार र उपप्रमुख पूनमकुमारी चौधरीको विशेष निर्देशनमा नगर क्षेत्रका सामुदायिक विद्यालयका प्रअहरुको बैठकले निर्णय गरेर प्रथम त्रैमासिक परीक्षा लिन थालेको हो ।

गरुडा नगरपालिका क्षेत्रमा सामुदायिक विद्यालयको संख्या २३ रहेको छ । साउन १ देखि गर्मी तथा वर्षे विदा सुरु हुने भएकोले प्रथम त्रैमासिक परीक्षा लिएर मात्र विद्यालयमा विदा दिन नगरपालिकाको निर्देशन भएपछि नगरका सबै विद्यालयमा एक साथ परीक्षा सुरु भएको हो ।

गत वर्ष विद्यालयमा निकै कम पठनपाठन भएको भएको थियो । गत वैशाखदेखि चालू शैक्षिक सत्र सुरु भएको भए पनि जेठदेखि मात्र पढाइ सुरु भएको हो । विद्यालयमा निकै कम पढाइ हुँदा पनि शैक्षिक सत्रको बाँकी गतिविधिलाई ठिक किसिमले सुचारु गर्न नगरमा पहिलेको चलनअनुसार प्रथम त्रैमासिक परीक्षा सुरु गरिएको नगरको शिक्षा शाखाले जनाएको छ ।

नगर क्षेत्रका केही संस्थागत विद्यालयहरुले पनि प्रथम त्रैमासिक परीक्षा लिइरहेको छ ।

जिल्लाका अन्य पालिकाका सामुदायिक विद्यालय साउन १ देखि भदौ २ गतेसम्म धमाधम बन्दको सूचना निकालिरहेको समयमा गरुडा नगरपालिकाले प्रथम त्रैमासिक परीक्षा सम्पन्न गरेर मात्र नियमानुसार विद्यालयमा गर्मी तथा वर्षे विदा दिइने नगर प्रमुख कन्थमनि प्रसाद कलवारले जानकारी गराएका छन् ।